Résumé : Dieu Père de tous les humains, les a crées comme ses fils et ses filles pour que l’humanité vive dans la paix, chaque homme et chaque femme partageant ainsi une égale dignité. Dieu pour réaliser son plan de paix, nous envoie Jésus qui vient sauver l’humanité pour l’aider à réaliser cette égale dignité dans la paix. Jésus le fait en venant à notre rencontre. C’est en Jésus que Dieu nous donne le modèle de la rencontre qui sauve l’humanité de la violence, de la guerre. Pour construire la paix, developons une culture de la rencontre….à l’image de Jésus.
LA FRATERNITE ki exis parski nou tou zanfan Bon Die, SA MEM RASINN EK SIME POU LA PE: se le Pape François ki pe anvoy nou sa mezaz azordi. si tou dimoun akcepte Bon Die Kouma enn papa, ler la to akey tou dimounn kouma to frer ek to ser. et non pa kouma enn etranze, ou soi enn lennmi !.
Bon die Finn Cree tou dimounn lor la ter, pou nou viv dan la Paix, comme frer ek ser. Parski Bon Die li Papa tou dimounn lor la ter, alors tou dimounn lor la ter bizin frer ek ser- E nou tou kone : se dan la paix ek fraternite ki nou trouv nou vre boner ki Bon Die finn donn nou kan li cree nou kom so zanfan. Pli nou viv kouma zanfan Bon Die pli nou konsider tou dimounn lor la ter kouma nou frer ek nou ser. Sa fraternite la pli for ki lapartenans race, ki regroupeman politik, ki solidarite ekonomik, fan clib sportif. la fraternite universelle pli for ki ban fraternite landroit, familial,
Limanite trouv so boner kan liviv dan la paix, dan la fraternite kot li resanble Bon Die Papa ki viv dan larmoni avek so garson Zezi, ek Lespri Sin. Zistwar Caën ek Abel dan la Bib montre ki la pe ek fraternite li an mem tan grave dan nou leker me an mem tan nou kapav trahi li dan la violans enver enn frer.. Bon Die pa kontan la guer, la division, la violans. Li Finn Anvoy Zezi pou realiz so Volonte ki limanite viv dan la Paix.
Ki manier Zezi fer sa? Li vinn realiz la Paix so Papa par so manier li vinn rankontrer nou. Manier Zezi renkontre nou samem model pou nou konstrir la paix. Sa mem lexamp pou nou konstrir la paix. Fer se ki Zezi fer…. ler la ou pou konstrir la paix, ou pou gout lapaix ki Bon Die finn kree pou limanite.
KONTANPLASION ZEZI
- Zezi raprose. Li partaz lavi ordiner tou dimounn. li sort depi so grander li vinn rankontre nou. Et li rankontre nou kouma enn pov ti baba pena plas pou li sinon dan manzoir zanimo. li pass 30 banane viv trankil dan so vilaz , li partaz travay so papa sanpantie, li fer so katesis dan Temp, li dialogue avek so mama. Kan li koumans so mission, toultan li lor sime, dan la kaz dimounn,…..toultan li pe met dialog, gueri bann malad, pardone,li invit limem pou manze kot Zase,li devlop enn lamitie avec la fami Marthe ek Marie, li vibre ar lazoi divan bann dimounn simp, li an koler kont pese, li angoise divan la mor,…. Zezi enn frer limanite; li pros avek nou la zoi, lespwar, la tristes, langwas
- Zezi met dialog, li poz kestion pou li compran ki dimoun pe viv, ki dimounn panse, ki zot soufans, Zezi poz enn regar bienveillan, compatisan. li pa ziz dimounn.
- ler la kan li finn raprose, kan li finn dialogue, kan li finn pas 30 banane pou konpran, li pas a laksion : li gueri, li rasamble; li anseigne, li balie malpropte dan Tamp ek dan la vie bann fasisien,li soizir so bann disip pou kontignn travay la …….. enfin li al ziskobou so konba ; li donn so la vie kouma enn semans ki tom dan la ter. li paret perdi, fini me li pou donn boukou frui : so rezireksion pou enn la fors, enn lenerzi extra pou pouss tou bann chretien travay pou la paix ziska zordi zour, met bonn lorganizasion dibout, rasamble, donn mesaz.
APLIKASION DAN LAVI.
Frer ek ser anou koumans sa lane là lor enn bon lipie : anou konstrir la paix, anou konsstrir la fraternite. Pou nou konstrir la paix anou devlop enn labitid rankontre nou kamarad lor model ki Zezi finn donn nou.
Premier maniere pou konstrir la paix se les la paix Bon Die envahi nou. anou rekonet ki malgre nou leker bizin li, par nou prop lafors nou pa kapav, …….Si to pena la paix dan to mem to pa pou kapav sem la paix. Alors koumans par akeyir la paix Bon Die dan to mem: li finn kree twa pou sa; koumans par les Zezi so mannier fer anvahi twa.
DAN FAMI
Si to anvi konstrir la paix dan to la kaz,….( to anvi konstrir la paix dan to fami ?) vinn kamarad avec to zanfan. Toi papa zoue boul avek to ti garson, toi mama zoue zouzou menaz avek to ti fi. Paran vinn kamarad avek zot zanfan.(témoignage perso). Le Pape François dir nou ki : Se dan fami ki tou imin aprann la fraternite. La fami, sa mem premie simin pou la paix. Samem premie lekol rekonsiliasion. Samem premier liniversite pou viv an societe ;
DAN KARTIER BOIS MARSAN
Si to anvi konstrir la paix, dan to kartier….. ( to anvi konstrir la paix dan Bois Marsan… ?aret laguer, tou dimounn donn koud me ?) vinn frer avec to voisin. Al bat enn domino avek li. Invit li enn ti manze, Fer enn pelrinaz 14 legliz avec li. Fer enn lekip sport. Particip ansam dan legliz
DAN TRAVAY
Si to anvi konstrir la paix dan to travay, fer to travay vinn enn fami, pran ler manze ansam, donn koud ma enn kamarad fatige, poz li kestion lor so problem lakaz : derier sa bater boul la ena enn leker zom…. fam pe bate. Rankontre li.
DAN PEI
Si nou anvi konstrir la paix dan nou pei, nou bizin devlop enn lespri fraternite partou : enn sourir dan bazar, enn alo dan supermarket, enn service lor lari, donn to plas dan bis enn madam ou enn zanfan, ouver enn konversasion avek sa tonton la, koz enn parol avek sa zeness la, enn kantite lokazion zis lamour pou inspir twa.
SANZ TO REGAR
Pa get sa boug la dabor kouma enn hindou, enn misilman enn kreol , enn sinois, Pa get li kouma enn rouz, enn mov, enn oranz ou enn ble : Get li dabor kouma enn humin ki so leker pe bate kouma to mem. Li pe debat ar sa lavi la parey kouma twa. Sanz to regar !!!
Kan pena fraternite, lamem mefians, lager, movez panse, tout sort kalite violans instale parmi nou : violans dan nou regar, violans dan nou parol ; violans dan nou aksion, violans dan nou silans. Violans dan nou indiferans.
Kan pena fraternite, nou pran lezot kouma enn lennmi ki bizin mefie : ler la nou lizie ek nou parol cras dife.
DAN LEKONOMI
Sa bann principe ki bizin viv o nivo individiel bizin osi viv li o nivo bann secteur lorganizasion la societe. pou konstrir la paix bizin la fraternite exis o nivo econimik.le pape François atir nou latansion:
Ena laguer koud fizi ek canon…. me ena la guer ekonomik ki pe detrir dimounn ek zot fami parski rises pa bien distribie, la sans pa egal.
konstrir la paix li pa selma en nivo individiel me enn nivo ban strictir organisasion social el ekonomik.
SI TO LE KONSTRIR LA PE DEVELOP ENN KILTIR FRATERNITE. SI TO LE KONSTRIR LA PE, KONSTRIR ENN MONDE LAKORITE ; PA ZIS BEL BEL LiDE ; ME MET ANPLAS BANN ACTION.
Ki anpess nou vinn frer dan lavi azordi ?
Pou konstrir la fraternite ou bizin apros avek dimounn ! Komie kit soz eloignn nou avek dimounn dan nou prop lakaz, dan nou voisinaz, dan nou travay ? Dabor lindiferans : komie papa mem pa kone ki klas zot zanfan, komie zanfan pa mem kone ki travay papa ou mama pe fer ! Enn voizin, enn travayer dan lizin dan biro se ban nimero sitan nou abitie. Competision dan travay, conkirans dan lekol, sirkilasion lor lari, fose ant ris ek pov dan saler ek konsomasion fer twa truv dimounn kouma enn ennmi, kouma enn konkiran : soit to zalou li, soit to anvie li , soit li plin to tenk. To pa enn frer, enn ser ! Telefonn portab, internet ek tablet ki sipoze rapros twa avek dimounn loin…. zot eloignn twa avek bann pros ! kom di Benoit XVI internet rapros nou me li pa fer nou vinn frer .Internet sipoze rapros twa me li pa fer twa vinn ni enn frer avek sa dimounn 1000 km distans ki to pe truv so foto, et an pli li eloignn twa avec dimounn ki pre kot twa.. ! Sitan laparey foto finn pran limportans, mo divan twa to get mo foto, mo divan twa to truv mo foto pli zoli ! dan Bis dan loto, dan mariaz dan restoran, dan lakaz dan lari, saken enferme dan so portab. Li pre avek dimounn loin, li loin avek dimounn pre ! Le pape François dir nou ena enn mondialisation lindiferans ki fer twa abitie avek la soufrans; to nepli trouve. Ki sa ve dir : sa ve dir tou dimounn lor la ter indiferan art tou dimounn lor la ter malgre et gras a internet. La miser, catastrof ek laguer ki fer dimounn soufer ? : monn fatige trouv foto defile lor mo lecran ek bla bla bla lor radio…… Alime teigne lor lekran, sitan fatig mwa ki mo latet brouyie. Bann dimounn, bann katastrof vinn enn nimero ki defile. Mo vinn indiferan. Monn plin !
kan solidarite kartie pli for ki fraternite universel; to pa zanfan Bon Die.
Kan lintere politik, pli for ki fratenite universel, to pa zanfan bon Die.
kan lintere larzan pli for ki fraternite universel, to pa enn zanfan Bon Die.
pou nou viv la paix bizin le Bien Commun pass avan bann lintere sectoriel, mem si lintere sectoriel li kapav bon.
kan lapartenans race,couler,kiltir pli for ki fraternite universel, to pa zanfan Bon Die. kan sa arive sa mem ki fer la guer, linsekirite, la mefians; la per,
RESUME :
Lape li abit leker tou dimounn parski Bon Die finn kree nou pou viv an pe.
nou tou bizin konstrir la pe dabor get lexamp Zezi.
Lape li konstrir lor diferan nivo =
personnel, familial, kartier, pei, ekonomik ek politik.
AVEK LE PAPE FRANCOIS NOU DIR
LA FRATERNITE ki exis parski nou tou zanfan Bon Die, SA MEM RASINN EK SIME POU LA PE:
Ler la limamnite pou aksepte TROIS DEVOIRS:
devoir de solidarité,
devoir de justice sociale,
devoir de charité universelle;
Kan ou met ou frer an premie ou pa kapav met profit avan li.
kan ou met ou frer ek ser an primier, pouvwar sort segon !!!!!
se mank fraternite ki la sours la miser dan lemonn( Caritas in Veritate)
se mank fraternite ki la sours laguerr.
Laisser un commentaire