Le dimanche 27 octobre 2013 a eu lieu, à l’auditorium Octave Wiehe, la première convention créole à Maurice dont le thème était « Kreol dan ledikasion segonder ». A l’issue de la journée, une charte a été élaborée et votée, à mains levées, par l’Assembée. Ci-dessous, l’intégralité de la charte intitulée « Sart pou lavansman sak fami kreol dan ledikasion ».
Introdiksion
Ledikasion enn drwa, enn devwar pou tou imin. Tou sosiete bizin travay pou ki sak fami gagn drwa ledikasion san okenn distinksion kiltir, kouler, relizion ou klas sosial. Tou imin bizin fer tou seki posib pou gagn akse e profit o maximum sa bann drwa la.
Bann fami kreol ena rezilians dan zot : kapasite pou sirmont zot bann difilkilte. Sa rezilians-la finn komanse depi lesklavaz e li pe kontinie ankor azordi. Bann fami kreol ena enn vizion pou zot lavenir: zot anvi reisi dan ledikasion ! Nou dir ansam: ledikasion esansiel pou lavenir !
Artik 1 Nou, bann fami kreol, nou kapav soutenir nou zanfan, tifi ek garson, dan ledikasion pou zot reisi. Nou interese ar zot letid, memsi nou pa konn lir ek ekrir. Nou fer bann swa pouki nou bann zanfan reisi. Nou met disiplinn e kre lespas pou nou bann zanfan aprann. Ledikasion enn priorite pou nou, memsi si bizin sakrifie bann lwazir! Nou kapav met kas dekote pou ledikasion e itiliz tou bann fasilite ki gouvernman ek lezot asosiasion propoz nou.
Artik 2 Nou, bann lezot manb fami kreol (matant, granmer, kouzinn, kouzin, etc.), nou kapav zwe enn rol inportan dan ledikasion bann zenn. Nou kapav dir enn parol for ki ankouraz zot.
Artik 3 Nou, kreol, kapav reisi parski ena bann rol-model ki ed nou avanse par lekzanp ki zot done, par zot reisit dan ledikasion ek zot parkour profesionel.
Artik 4 Nou kapav reisi parski nou lafwa samem nou lafors. Zezi enn model revolision ki invit nou pa bes lebra. Bann mouvman Legliz donn nou bann zouti pou dibout lor nou lipie. Lapriyer zwe enn gran rol dan nou lavi !
Artik 5 Nou kapav reisi, parski nou pwiz nou lafors dan nou listwar. Nou fier nou kiltir e nou langaz kreol. Nou kiltir samem nou lidantite, sa mem nou rises !
Artik 6 Nou kapav reisi, ki nou sorti dan lakanpagn, lor lakot, dan site, dan lavil ou dan zil !
Artik 7 Nou kapav reisi parski kritik ek prezize pa enn baryer: li enn lafors pou fer nou avanse. Kritik ranforsi nou tanperaman !
Artik 8 Nou kapav reisi parski nou persevere, nou ena konfians dan nou, nou lite ! Nou pran sarz nou lavi ! Nou pran nou lavi dan nou lame ! Nou konstrir nou lavi !
Artik 9 Nou kapav reisi parski viv ansam avek lezot kominote enn lokazion pou fer nou al pli divan, pran nou lanvol.
Artik 10 Nou kapav reisi parski nou sir ki solidarite samem ki pou fer nou avanse !
Kan kreol lite, kreol kapav !
Laisser un commentaire