Mo la devan zot, kouma enn profet dan LaBib, dibout devan lepep,

Pou annons-zot ki zordi, 1^er fevryer, lane 2010,

Enn lane kot Bondie pe grave dan listwar kreol dan Moris.

Kouma profet Isaï dir dan LaBib,

Enn zetwal ape briye pou enn lepep dan mare-nwar.

Lane 2010, enn lane sinbolik, li mark enn tournan,

Lane 2010, sa fer 175 zan, ki lesklavaz finn aboli ofisyelman dan Moris,

175 zan, arezon de 25 an par zenerasion – li fer 7 zenerasion,

E sif 7 dan laBib, li signifye latotalite – letan finn mir – ler finn arive.

Lor linitiativ Mgr. Margeot,

alor ki okenn otorite sivil ni politik pa ti enkor fer nanien…

Et zordi nou pe fet 25 an lames, isi a l’Escalier,

kot Roger Cerveaux Curé – kot lavwa Roger Cerveaux,

alokasion 1^er fevryer, ti deklans enn priz de konsians dan lEgliz ek dan pei,

lor sor bann kreol, zot plas, zot malez.

Marke garde, bann done finn sanze,

Konportman electoral bann kreol, desandan esklav,

Li pou nepli seki li ti ete.

Li pa enn zour kot nou fet Labolision lesklavaz –

Parski kan nou dir fet – li resime a bwar divin, sapo lapay lor latet, al kas lerin….

Finn ler pou arete ar sa !

Non, zordi 1^er fevrye 2010,

Finn ler pou kreol pran konsians

ki li enn zour de ‘commémoration’ = fer memwar.

Ki li ete : nou konekte/relie nou ar nou listwar,

Parey kouma dan laBib,

Konekte nou atraver listwar ar bann maron,

Ek zot lespri, ek zot konba – soufrans.. pou la liberte.

Finn ler pou selebre sa zour memorab-la, dan dignite,

Kot Montagne LeMorn –

Atraver enn vre pelerinaz kot pou ena enn lames solanel granmatin,

Pou fer memwar, pou konekte avek bann zanzet maron.

Finn ler pou fer Montagn LeMorn vinn enn montagn sakre

Pou relie nou avec bann lespri nou zanzet.

Finn ler kot nou kreol kretien avek bann frer/ser rasta,

Kot sak 1^er fevryer, avek konkour bann otorite piblik,

Nou organiz enn veritab pelrinaz,

Inspire de seki LaBib dir kan fer pelrinaz pou al Zerisalem.

Finn ler pou nou fer Montagn LeMorne,

enn montagn sakre pou tou desandan esklav ek maron.

Ki fer mo dir sa ? Al get dernye paragraf rapor l’UNESCO

Kan li ti dekret Montagne Lemorn Patrimoine mondial

Li dir ki Montagn Lemorne dress li kouma enn signn vivan

Resistans pou la kominote kreol, desandan esklav.

Finn ler pou kreol honor dan dignite ek ferver Montagn LeMorn.